TUAIWA (EVA) RICKARD

O TE RANGATIRATANGA
O WHAINGAROA
I roto i tēnei wā, te tekau mātahi o ngā rā o Hui Tanguru o te tau 1996, e hoki ana ngā mahara ki ngā wā i tūkunotia, aa, takahia ai e Tauiwi ngā Iwi Tūturu Tangata Whenua o te ao, ā, i ngaro ai ō rātou Mana Motuhake.
Kia ahatia. Tērā anō hoki te wā i taea ai e rātou te karo i tauatūkinotanga.
Kia tū ake anō tō Mana Motuhake i tangohia rā.
Kua tae ki te wā, mō te iwi o Te Whaingaroa ki te whakatau i tō rātou Mana Motuhaketanga me tō rātou Tino Rangatiratanga.
Ko tenei kaupapa e tautoko ana, Ka whakahaeretia e te iwi o Te Whaingaroa i raro i ngā tikanga whakahaere katoa e noho pumau ana i raro i te kaupapa Mana Motuhake.
Aa, Ka whakahaeretia hoki i raro i ngā tikanga tuawhakarere a ngā tūpuna.
Ki te hoki anō ki aua tikanga, kei te hoki ki te tūturutanga o Te Tino Rangatiratanga o te iwi whānui, tatū atu ki te Mana Māori Motuhake mai rā anō.
Ko te hikinga o tēnei kaupapa, kei hiki hoki i ngā taumahatanga, engari kei roto anō i te wairuatanga e haere tahi ana te humārietanga me ihiihi.
Hei whakapumau i tō tātou Tino Rangatiratanga me unuhi atu te mana o te hunga e takahi tonu nei i ā tātou engari kia pahure a tātou i ngā tikanga muru oranga a tauiwi.
Anei hoki, kia mōhio mai koutou ngā hapū me ngā iwi puta noa i te motu, Ka whakaritea ake he tikanga e taea ai te tuitui te rangaranga i te whanaungatanga me te tōtika o te nohongatahitanga, arā hoki ki ō tātou whanaunga, ngā Tūturu Tangata Whenua o te Ao.
Nō reira e ngā Kārangaranga o roto i a tātou, Kia hikina tēnei kaupapa, kia eke ki tonu taumata.
Tūturu whakamaua kia tinaa! Tinaa! Hui e, Tāiki e.