Tane Mahuta – El Viejo

Tērā te wā i te kore e noho piri ana ngā mātua, arā, a Ranginui me Papatūānuku. Nā tēnei piri tata ka tīmata ngā amuamu, ngā whakahē a ngā tamariki i te kōtē me te kōpā o tā rātou noho. Ka puta te whakaaro kia whakawehea ngā mātua kia puta ai rātou ngā tamariki ki te ao mārama. Heoi he pakanga i tū i waenganui i ngā atua nei kia kite mā wai e whakawehe. I a Tāne te whakaaronui mō te katoa, ā, i te tīmatanga kāore ia i uru ki te whawhai. I riro mā Tūmātauenga, mā Tūkariri kē hei pakanga ki ngana tēina. Ko te toto ka heke i ngā whawhai ka uru ki te poho o te whaea, o Papatūānuku. I tana toa ka tukuna e Tū ngana tēina ki ngā wāhi e noho nei rātou i tēnei wā tonu nei; a Tangaroa ki te moana, a Haumietiketike ki te whenua, a Rongo–mā- tāne ki te whenua, a Tawhirimātea ki ngā ringa kapua awhi o tana matua, o Ranginui. Ka ngunguru tonu a Rūaumoko, te pōtiki, i te poho o tana whaea. Nā ngēnei mahi kino a Tū ka ara ake a Tāne ki te whawhai ki tana tēina me tana kī,” Ahakoa te aha ko au tonu te tuakana, te mātaamua, nā reira he tika kē atu māku ngō tātou mātua e whakawehe.” Ka pupuri ia ki tana whaea ki ngōna ringa me te whātoro atu i ngōna waeawae hei pana atu i tana matua. Tae noa ki tēnei wā kei te noho wehe tonu ngā mātua.
Ahakoa kāore ia i te hiahia kia pērātia ngōna mātua i mōhio kē ia koirā tonu te huarahi e puta ai rātou ki te whei ao. Ko Tānemāhuta hei tauira tuatahi i te ao Māori mō tēnei mea te whakahē engari he hua pai i puta i ngāna mahi whakahē. Ko tātou ngā uri whakaheke ka noho pai i tēnei ao tūroa nā tana mahi whakahē. Ka kitea tonuhia a Tāne e whakatinanahia ana hei rākau kākahu i tana whaea, arā, ko ngā rākau e piri tonu ana ki a Papatūānuku ki ngōna ringa me tōna pane, me ngōna waewae e ahu tonu atu ana ki te Rangi, hei tauira o tāna mahi.

Text / Texto:
Te Rita Papesch
Kirikiriroa/Hamilton, Aotearoa/New Zealand
August 2007